सोनं झालं ‘सोनेरी’ आणि चांदीची चकाकी वाढली !
सणासुदीच्या पार्श्वभूमीवर सोन्या-चांदीचे दर गगनाला भिडले
जळगाव प्रतिनिधी
सणासुदीचा हंगाम आणि लग्नसराईचा काळ सुरू असताना सोन्या-चांदीच्या दरांनी नवा विक्रमी उच्चांक गाठला आहे. किंमतीत झालेल्या मोठ्या वाढीमुळे सामान्य ग्राहकांना मोठा आर्थिक फटका बसत आहे.
जळगावच्या सुवर्ण बाजारात सोन्याचा दर जीएसटीसह तब्बल ९०,६०० रुपये प्रतितोळ्यावर पोहोचला आहे, तर चांदीनेही नवा विक्रम प्रस्थापित करत १,०४,००० रुपये प्रतिकिलो हा टप्पा पार केला आहे. या दरवाढीमुळे ग्राहकांनी खरेदीला ब्रेक लावल्याचे चित्र सराफ बाजारात पाहायला मिळत आहे.
दरवाढीमागील कारणे
गेल्या काही महिन्यांपासून सोन्या-चांदीच्या दरात सातत्याने वाढ होत आहे. जागतिक बाजारातील अस्थिरता, वाढीव आयात शुल्क आणि सुरक्षित गुंतवणुकीचा पर्याय म्हणून सोन्याला मिळणारी प्राधान्यतामुळे दर गगनाला भिडले आहेत. अमेरिकेचे माजी अध्यक्ष डोनाल्ड ट्रम्प यांच्या व्यापार धोरणांमुळे जागतिक व्यापारयुद्धाच्या भीतीत वाढ झाली होती. परिणामी, गुंतवणूकदारांनी सोने खरेदीकडे अधिक कल दाखवला आणि त्याचा थेट परिणाम स्थानिक बाजारावर झाला.
लग्नसराईत खरेदीला फटका
सणासुदीच्या हंगामात आणि लग्नसराईत पारंपरिक दागिन्यांची मोठी खरेदी होते. मात्र, सध्याच्या प्रचंड वाढलेल्या किमतींमुळे अनेकांनी सोन्या-चांदीची खरेदी टाळण्याचा निर्णय घेतला आहे. व्यापाऱ्यांच्या मते, मागणी कमी झाल्याने बाजारात सध्या मंदीचे वातावरण निर्माण झाले आहे
विशेषज्ञांच्या मते, पुढील काही आठवड्यांतही सोन्या-चांदीच्या किमती उच्च पातळीवर राहण्याची शक्यता आहे. त्यामुळे सोनं खरेदी करायचं की थांबायचं, हा प्रश्न सामान्य ग्राहकांना भेडसावत आहे. अशा परिस्थितीत, आगामी काळात सराफ बाजारातील हालचालींवर सर्वांचे लक्ष लागले आहे.
