वाघुर ३३ केव्ही वीजवाहिनीच्या दुरुस्तीसाठी ४ जुलैला शटडाऊन
पावसाळ्याच्या पार्श्वभूमीवर देखभाल कामासाठी महावितरणला मनपाची ना-हरकत
जळगाव | प्रतिनिधी
वाघुर धरण परिसरातील पंपिंग स्टेशन आणि उमाळा जलशुद्धीकरण केंद्राचा वीजपुरवठा सुरळीत राहावा, यासाठी वाघुर ३३ केव्ही उच्चदाब वीजवाहिनीवरील देखभाल आणि दुरुस्तीची कामे हाती घेण्यात येणार आहेत. यासाठी जळगाव शहर महानगरपालिकेच्या पाणीपुरवठा विभागाने महावितरणला ४ जुलै २०२६ रोजी शटडाऊन घेण्यास ना-हरकत दिली आहे.
एमआयडीसी परिसरातून वाघुर पंपिंग स्टेशनपर्यंत सुमारे २८ किलोमीटर लांबीची वीजवाहिनी टाकण्यात आली असून, याच वाहिनीद्वारे पंपिंग स्टेशनला वीजपुरवठा केला जातो. आगामी पावसाळ्याच्या पार्श्वभूमीवर या वीजवाहिनीवरील आवश्यक दुरुस्तीची कामे करणे अत्यावश्यक असल्याचे पाणीपुरवठा विभागाने नमूद केले आहे.
महावितरणला शनिवार, ४ जुलै २०२६ रोजी सकाळी १० ते दुपारी ५ वाजेपर्यंत वाघुर ३३ केव्ही उच्चदाब वीजवाहिनीचा वीजपुरवठा बंद ठेवण्यास परवानगी देण्यात आली आहे. संबंधित दुरुस्तीची कामे निर्धारित वेळेत पूर्ण करून वीजपुरवठा पूर्ववत सुरू करण्याच्या सूचना देण्यात आल्या आहेत.
शहराचा पाणीपुरवठा विस्कळीत होऊ नये, यासाठी कामे वेळेत पूर्ण करणे आवश्यक असल्याचे उपअभियंता, पाणीपुरवठा विभाग, जळगाव महानगरपालिका यांनी पत्राद्वारे स्पष्ट केले आहे.
