वाघूर नदीत बुडलेल्या ६० वर्षीय वृद्धाचा २४ तासांनंतर लागला शोध
पाण्याखालील झाडांत अडकलेला मृतदेह बाहेर काढण्यात अग्निशमन दलाला यश
जळगाव (प्रतिनिधी): मौजे कळगाव गावाजवळील वाघूर नदीच्या पात्रात बैलांना पाणी पाजण्यासाठी गेलेले ६० वर्षीय अरुण माधव कोळी यांचा पाण्याचा अंदाज न आल्याने पाय घसरून नदीत बुडाल्याची दुर्दैवी घटना घडली होती. तब्बल २४ तासांच्या अथक आणि कठीण प्रयत्नांनंतर जळगाव महानगरपालिकेच्या अग्निशमन दलाला मंगळवारी सकाळी त्यांचा शोध घेण्यात यश आले. पाण्याखालील झाडाझुडपांमध्ये अडकलेल्या अवस्थेत अरुण कोळी यांचा मृतदेह रबर बोटीच्या साहाय्याने बाहेर काढण्यात आला असून, बचाव पथकाच्या या शोधमोहीमेचे ग्रामस्थांकडून कौतुक केले जात आहे.
सोमवार, ५ ऑक्टोबर रोजी सकाळी साडेनऊ वाजेच्या सुमारास अरुण कोळी हे नेहमीप्रमाणे आपल्या बैलांना पाणी पाजण्यासाठी वाघूर नदीवर गेले होते. मात्र, पाण्याचा अंदाज न आल्याने अचानक त्यांचा पाय घसरला आणि ते पाण्याच्या वेगात वाहून गेले. घटनेचे गांभीर्य ओळखून उपस्थितांनी तातडीने गावकरी व प्रशासनाला याची माहिती दिली. सकाळी १० वाजता जिल्हाधिकारी कार्यालयातील आपत्ती व्यवस्थापन विभागामार्फत जळगाव शहर महानगरपालिका अग्निशमन दलाला पाचारण करण्यात आले. माहिती मिळताच जिल्हा आपत्ती व्यवस्थापन अधिकारी नरवीर रावळ आणि जळगाव मनपा अग्निशमन केंद्र अधिकारी भारत बारी यांच्या थेट मार्गदर्शनाखाली तातडीने शोध व बचावकार्य हाती घेण्यात आले.
सोमवारी दिवसभर गावकरी आणि प्रशासनाने नदीपात्रात शोध घेण्याचा प्रयत्न केला. त्यानंतर मंगळवारी सकाळी पुन्हा एकदा अग्निशमन दलाच्या पथकाने रबर बोटीच्या साहाय्याने वाघूर नदीच्या पात्रात अत्यंत कसून शोधमोहीम राबवली. या दरम्यान, नदीच्या तळाशी असलेल्या दाट झाडांमध्ये अरुण कोळी अडकलेल्या अवस्थेत आढळून आले. पाण्याखाली झाडेझुडपे असल्याने मृतदेह बाहेर काढताना बचाव पथकाला प्रचंड अडचणींचा सामना करावा लागला. मात्र, पथकाने मोठ्या धैर्याने आणि कौशल्याने अथक प्रयत्न करून अखेर त्यांना नदीपात्रातून बाहेर काढले.
शोधकार्य यशस्वीरीत्या पूर्ण झाल्यानंतर अरुण कोळी यांचा मृतदेह तलाठी, पोलीस पाटील आणि उपस्थित ग्रामस्थांच्या ताब्यात देण्यात आला. सलग २४ तास राबवलेल्या या आव्हानात्मक आणि अथक शोधमोहीमेबद्दल स्थानिक ग्रामस्थांनी अग्निशमन विभागाचे आभार मानत त्यांच्या कामगिरीचे कौतुक केले. या संपूर्ण शोध व बचावकार्यात टीम प्रमुख प्रकाश चव्हाण यांच्यासह देविदास सुरवाडे, प्रदीप धनगर, सौरभ चिकटे, योगेश पाटील, किरण महाजन, महेंद्र कोळी आणि बांभोरी येथील विकास सोनवणे यांनी महत्त्वपूर्ण भूमिका बजावत सहकार्य केले.
