पेट्रोल-डिझेल पुन्हा महागले !

पेट्रोल-डिझेल पुन्हा महागले !

दहा दिवसांत तिसऱ्यांदा दरवाढ; सर्वसामान्यांच्या खिशावर वाढता भार

नवी दिल्ली प्रतिनिधी पेट्रोल, डिझेल आणि सीएनजीच्या दरात पुन्हा वाढ करण्यात आली असून, गेल्या दहा दिवसांतील ही तिसरी दरवाढ ठरली आहे. शनिवारी पेट्रोलच्या दरात प्रतिलिटर ८७ पैशांची, तर डिझेलमध्ये ९१ पैशांची वाढ करण्यात आली. याशिवाय दिल्ली परिसरात सीएनजीच्या दरातही प्रतिकिलो १ रुपयांची वाढ करण्यात आली आहे. सततच्या दरवाढीमुळे सर्वसामान्य नागरिक, वाहनधारक आणि शेतकरी वर्ग चिंतेत सापडला आहे.

दहा दिवसांत तब्बल पाच रुपयांची वाढ

यापूर्वी १५ मे रोजी पेट्रोल आणि डिझेलच्या दरात प्रत्येकी ३ रुपयांची वाढ करण्यात आली होती. त्यानंतर १९ मे रोजी पुन्हा इंधनाच्या दरात सुमारे ९० पैशांची वाढ झाली. आता झालेल्या नव्या दरवाढीमुळे गेल्या दहा दिवसांत पेट्रोल आणि डिझेल सुमारे ५ रुपयांनी महाग झाले आहेत.

नव्या दरानुसार हैदराबादमध्ये पेट्रोलचा दर प्रतिलिटर ११२.८१ रुपयांवर पोहोचला असून, तो देशातील सर्वाधिक दर मानला जात आहे.

आंतरराष्ट्रीय परिस्थितीचा परिणाम

आंतरराष्ट्रीय बाजारातील कच्च्या तेलाच्या किमती, तसेच डॉलरच्या तुलनेत रुपयाची घसरण यामुळे इंधन दरावर दबाव वाढत असल्याचे सरकारी तेल कंपन्यांचे म्हणणे आहे. इंडियन ऑईल, भारत पेट्रोलियम आणि हिंदुस्तान पेट्रोलियम या सरकारी कंपन्या ‘डायनॅमिक प्राइसिंग सिस्टीम’ अंतर्गत दररोज सकाळी ६ वाजता नवीन दर जाहीर करतात.

दरम्यान, पश्चिम आशियातील तणावपूर्ण भू-राजकीय परिस्थिती लक्षात घेता पंतप्रधान नरेंद्र मोदी यांनी काही दिवसांपूर्वी नागरिकांना पेट्रोलियम पदार्थांचा संयमाने वापर करण्याचे आवाहन केले होते. इंधनाचा गरजेनुसार वापर केल्यास परकीय चलनाची बचत होईल आणि युद्धजन्य परिस्थितीचे परिणामही कमी होतील, असे त्यांनी म्हटले होते.

वाहतूक, शेती आणि बाजारपेठेवर परिणाम

इंधन दरवाढीचा परिणाम आता दैनंदिन जीवनावर दिसू लागण्याची शक्यता आहे. ट्रक, टेम्पो तसेच मालवाहतूक खर्च वाढल्याने इतर राज्यांतून येणाऱ्या भाज्या, फळे आणि रेशन महागण्याची शक्यता वर्तवली जात आहे.

शेतकऱ्यांनाही या दरवाढीचा फटका बसणार असून, ट्रॅक्टर आणि पम्पिंग सेटसाठी लागणाऱ्या डिझेलचा खर्च वाढणार आहे. परिणामी शेती उत्पादनाचा खर्च वाढण्याची शक्यता आहे. सार्वजनिक वाहतूक, स्कूल बस, टॅक्सी आणि रिक्षांच्या भाड्यातही वाढ होण्याची चिन्हे आहेत.

प्रमुख शहरांतील पेट्रोलचे नवे दर

प्रमुख शहरांतील डिझेलचे नवे दर