सोशल मीडियावरील भाईगिरी अन् स्टंटबाजी आता महागात पडणार! आक्षेपार्ह रील्स बनवणाऱ्यांवर पोलिसांचा ‘डिजिटल वॉच’
गुन्हेगारीचे उदात्तीकरण आणि महिलांचा अवमान करणाऱ्यांची गय नाही; सायबर पॅट्रोलिंगद्वारे थेट पोलीस मुख्यालयात बोलावून समुपदेशन
जळगाव (प्रतिनिधी): सोशल मीडियावर प्रसिद्धीच्या हव्यासापोटी गुन्हेगारीचे उदात्तीकरण करणारे, वाहतूक नियमांचे उल्लंघन करून जीवघेणी स्टंटबाजी करणारे आणि महिलांचा अवमान करणारे रील्स (Reels) बनवणाऱ्यांना आता जळगाव पोलिसांचा दणका बसणार आहे. अशा विकृत आणि समाजविघातक कृत्यांवर अंकुश ठेवण्यासाठी जळगाव पोलिसांनी विशेष ‘सायबर पॅट्रोलिंग’ मोहीम हाती घेतली असून आक्षेपार्ह रील्स बनवणाऱ्यांची आता थेट गय केली जाणार नाही.
तरुणाई भरकटू नये म्हणून पोलिसांचे पाऊल:
अनेकदा सोशल मीडियावर गुन्हेगारांना ‘नायक’ (हिरो) सारखे दाखवणारे आणि कायद्याची भीती न बाळगता स्टंटबाजी करणारे व्हिडिओ मोठ्या प्रमाणावर व्हायरल केले जातात. अशा व्हिडिओंमुळे शाळकरी मुले आणि तरुणांवर विपरीत परिणाम होऊन गुन्हेगारीकडे त्यांचे आकर्षण वाढण्याची शक्यता निर्माण झाली आहे. याशिवाय, अशा प्रकारांमुळे ज्येष्ठ नागरिकांमध्येही असुरक्षिततेची भावना निर्माण होत असल्याचे पोलिसांनी निदर्शनास आणले आहे.
कारवाईचा मुख्य हेतू केवळ दंडात्मक नाही:
सायबर पोलिसांकडून सध्या अशा संशयास्पद अकाउंट्स आणि रील्सची बारकाईने तपासणी केली जात आहे. ज्यांचे व्हिडिओ आक्षेपार्ह आढळतील, त्यांची ओळख पटवून त्यांना समुपदेशनासाठी थेट पोलीस मुख्यालयात बोलावण्यात येत आहे. याचा मुख्य उद्देश केवळ कायदेशीर किंवा दंडात्मक कारवाई करणे नसून, समाजात कायद्याबद्दल आदर निर्माण करणे आणि तरुणांना चुकीच्या प्रवृत्तींपासून परावृत्त करून सोशल मीडियाचा जबाबदारीने वापर करण्यास शिकवणे हा आहे.
वरिष्ठ अधिकाऱ्यांचे मार्गदर्शन अन् इशारा:
जळगाव जिल्ह्याचे पोलीस अधीक्षक श्रीकांत धिवरे, अपर पोलीस अधीक्षक संदीप गावीत यांच्या विशेष मार्गदर्शनाखाली सायबर सेलची टीम ही मोहीम अत्यंत प्रभावीपणे राबवत आहे. अभिव्यक्ती स्वातंत्र्याचा गैरवापर करून समाजविघातक संदेश किंवा तेढ निर्माण करणारी सामग्री पसरवणाऱ्यांवर कठोर कायदेशीर कारवाई करण्यात येईल, असा स्पष्ट इशारा पोलीस प्रशासनाने दिला आहे.
