जळगाव : एका 35 वर्षीय तरुणाने राहत्या घरी गळफास घेऊन आत्महत्या केल्याची घटना शनिवारी दि. १६ नोव्हेंबर रोजी पहाटे तालुक्यातील कुसुंबा येथेउघडकीस आली.. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे. लहू बाळू पाटील (वय ३५, रा. कुसुंबा, ता. जळगाव) असे मयत तरुणाचे नाव आहे.
औद्योगिक वसाहत परिसरात एका कंपनीत लहू पाटील हा कामाला होता. शुक्रवारी रात्री लहू पाटील व त्यांचे कुटुंबीय पुढील खोलीत झोपले होते. मध्यरात्री २ ते अडीच वाजेदरम्यान ते पाणी पिण्यासाठी उठल्याचे पत्नीने पाहिले होते. मात्र, त्यानंतर मध्यरात्री लहू पाटील यांनी मागील खोलीत जाऊन गळफास घेतला.
सकाळी ६ वाजता पत्नी झोपेतून उठल्यानंतर मागील खोलीचा दरवाजा लोटला असता पती गळफास घेतलेल्या अवस्थेत दिसल्याने पत्नीने हंबरडा फोडला. कुटुंबीयांनी शेजारील मंडळी व नातेवाईकांच्या मदतीने त्यास जळगाव शासकीय वैद्यकीय महाविद्यालय व रुग्णालयात दाखल केले पा असता डॉक्टरांनी तपासून त्यास मयत घोषित केले. यावेळी कुटुंबीयांनी एकच आक्रोश केला. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे. दरम्यान, त्याच्या पश्चात पत्नी, ७ वर्षांचा मुलगा, ४ वर्षांची मुलगी असा परिवार आहे.
