गणेशोत्सवापूर्वी जळगाव पोलिसांचा ‘एमपीडीए’चा दणका!
सराईत गुन्हेगार तन्वीर ऊर्फ तन्याची येरवडा कारागृहात रवानगी; ११ गंभीर गुन्ह्यांची नोंद
जळगाव | प्रतिनिधी — आगामी गणेशोत्सवाच्या पार्श्वभूमीवर जिल्ह्यातील कायदा व सुव्यवस्था अबाधित ठेवण्यासाठी जळगाव पोलिसांनी सराईत गुन्हेगारांविरोधातील प्रतिबंधात्मक कारवाईला वेग दिला आहे. याच मोहिमेअंतर्गत जळगाव शहर पोलीस ठाण्याच्या रेकॉर्डवरील तन्वीर ऊर्फ तन्या रहीम शेख (वय २१, रा. नुरानी मशीदजवळ, गेंदालाल मिल, जळगाव) याच्यावर महाराष्ट्र झोपडपट्टीदादा, हातभट्टीवाले, औषधद्रव्ये विषयक गुन्हेगार, धोकादायक व्यक्ती व इतर समाजविघातक व्यक्ती यांच्या प्रतिबंधक कायद्यानुसार (एमपीडीए) स्थानबद्धतेची कारवाई करण्यात आली आहे. त्याची येरवडा मध्यवर्ती कारागृहात रवानगी करण्यात आली.
तन्वीर शेख याच्याविरुद्ध जळगाव शहर पोलीस ठाण्यात जबरी चोरी, सरकारी कर्मचाऱ्यावर हल्ला, दुखापत, दंगा, घरफोडी तसेच आर्म्स ॲक्ट यांसारख्या गंभीर स्वरूपाचे एकूण ११ गुन्हे दाखल असल्याची माहिती पोलिसांनी दिली. २०२२ ते २०२६ या कालावधीत त्याच्यावर विविध प्रतिबंधात्मक कारवाया तसेच हद्दपारीची कारवाई करण्यात आली होती. मात्र, त्याच्या वर्तनात अपेक्षित सुधारणा न झाल्याने पोलिसांनी त्याच्याविरुद्ध एमपीडीएअंतर्गत कठोर कारवाईचा प्रस्ताव तयार केला.
जळगाव शहर पोलीस ठाण्याचे पोलीस निरीक्षक सागर शिंपी यांनी ११ ऑगस्ट २०२६ रोजी स्थानबद्धतेचा प्रस्ताव सादर केला. प्रस्तावाची दखल घेत जिल्हाधिकारी रोहन घुगे यांनी १४ ऑगस्ट रोजी एमपीडीएअंतर्गत स्थानबद्धतेचा आदेश जारी केला. आदेशानंतर पोलिसांनी तत्काळ कारवाई करत तन्वीर शेख याला ताब्यात घेतले आणि येरवडा मध्यवर्ती कारागृहात दाखल केले.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली करण्यात आली. स्थानिक गुन्हे शाखेचे वरिष्ठ पोलीस निरीक्षक राहुल गायकवाड, पोलीस निरीक्षक सागर शिंपी, सहाय्यक पोलीस निरीक्षक सुरेश आव्हाड तसेच त्यांच्या पथकाने कारवाईत सहभाग घेतला.
गणेशोत्सवासह आगामी सण-उत्सवांच्या काळात शांतता भंग करण्याची शक्यता असलेल्या सराईत गुन्हेगारांवर पोलिसांची करडी नजर असून, समाजकंटकांविरोधात प्रतिबंधात्मक कारवाई आणखी तीव्र केली जाणार असल्याचे पोलिसांकडून स्पष्ट करण्यात आले आहे.
