सुनेचा खून करून फरार सासऱ्याच्या जळगावात मुसक्या आवळल्या!
स्थानिक गुन्हे शाखेची धडाकेबाज कारवाई; मेहरूण परिसरात रचला सापळा
जळगाव : पुणे शहरातील रायकर मळा परिसरात घरगुती वादातून सुनेचा निर्घृण खून करून फरार झालेला सासरा भानुदास भास्कर चौधरी याला जळगाव जिल्हा स्थानिक गुन्हे शाखेने (एलसीबी) शिताफीने जेरबंद केले आहे. ही कारवाई ९ मे २०२६ रोजी मेहरूण परिसरातील महादेव मंदिर परिसरात रचलेल्या सापळ्यात पार पडली.
२ मे २०२६ रोजी पुण्यातील रायकर मळा येथे झालेल्या घटनेत आरोपीने आपली सून स्वाती तेजस चौधरी (वय २८) यांच्या डोक्यात घातक वार करून त्यांचा खून केला होता. त्यानंतर आरोपीने घराला बाहेरून कुलूप लावून फरार होण्याचा प्रयत्न केला. घरात लहान मुलाच्या रडण्याचा आवाज ऐकून शेजाऱ्यांनी माहिती दिल्यानंतर हा प्रकार उघडकीस आला.
या प्रकरणी पुण्यातील नांदेड सिटी पोलीस ठाण्यात भारतीय न्याय संहिता (BNS) कलम १०३(१) अंतर्गत खुनाचा गुन्हा दाखल करण्यात आला आहे. फरार आरोपीचा शोध घेत असताना जळगाव एलसीबीला गोपनीय माहिती मिळाली की तो मेहरूण परिसरात लपून बसला आहे. माहितीची खात्री करून पोलिसांनी तातडीने सापळा रचत आरोपीला अटक केली.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे यांच्या मार्गदर्शनाखाली, पोलीस निरीक्षक राहुल गायकवाड यांच्या नेतृत्वात पार पडली.
या कारवाईत पोलीस उपनिरीक्षक शरद बागल, सफौ अतुल वंजारी, पोहेकों विजय पाटील, अकरम शेख, नितीन बाविस्कर, प्रविण भालेराव, मुरलीधर धनगर, राहुल रगडे, रविंद्र कापडणे, प्रदीप चौरे यांचा सहभाग होता.
या धडाकेबाज कारवाईमुळे पुणे पोलिसांच्या तपासाला मोठा दिलासा मिळाला असून आरोपीला पुढील चौकशीसाठी ताब्यात देण्याची प्रक्रिया सुरू आहे.
