प्रभाग १३ मध्ये महायुतीचा ‘महाविजया’चा निर्धार; आमदार भोळे व माजी मंत्री देवकरांच्या उपस्थितीत भव्य रॅली
फटाक्यांची आतषबाजी आणि फुलांच्या वर्षावाने उमेदवारांचे स्वागत; प्रचाराच्या अंतिम टप्प्यात महायुतीचे शक्तिप्रदर्शन
जळगाव: जळगाव महानगरपालिका निवडणुकीचा प्रचार आता अंतिम टप्प्यात पोहोचला असून, प्रभाग क्रमांक १३ मध्ये रविवारी महायुतीने अभूतपूर्व शक्तिप्रदर्शन केले. आमदार राजूमामा भोळे आणि राष्ट्रवादी काँग्रेसचे ज्येष्ठ नेते तथा माजी मंत्री गुलाबराव देवकर यांच्या प्रमुख उपस्थितीत काढण्यात आलेल्या महारॅलीने संपूर्ण प्रभाग दणाणून सोडला. ठिकठिकाणी फटाक्यांची आतषबाजी, ढोल-ताशांचा गजर आणि फुलांच्या वर्षावात नागरिकांनी या रॅलीचे जल्लोषात स्वागत केले, ज्यामुळे प्रभागात महायुतीच्या विजयाचे वातावरण अधिकच गडद झाले आहे.
महायुतीचे अधिकृत उमेदवार प्रफुल्ल गुलाबराव देवकर, नितीन प्रभाकर सपके आणि सौ. सुरेखा नितीन तायडे यांनी रविवारी सुटीचे औचित्य साधून घरोघरी भेटी देत मतदारांशी थेट संवाद साधला. जास्तीत जास्त मतदारांपर्यंत पोहोचण्याच्या उद्देशाने काढलेल्या या रॅलीला तरुणांपासून ज्येष्ठांपर्यंत सर्वच स्तरांतून उत्स्फूर्त प्रतिसाद लाभला. “शहराच्या विकासाला गती देण्यासाठी आणि प्रभागाचा कायापालट करण्यासाठी आम्ही कटिबद्ध आहोत,” असा निर्धार तिन्ही उमेदवारांनी यावेळी व्यक्त केला.
या महारॅलीचे मुख्य आकर्षण म्हणजे महायुतीतील नेत्यांची एकजूट. आमदार सुरेश भोळे आणि माजी मंत्री गुलाबराव देवकर एकाच व्यासपीठावर आणि रॅलीत सहभागी झाल्याने कार्यकर्त्यांमध्ये नवा उत्साह संचारला होता. विकासकामांच्या जोरावर आणि महायुतीच्या ताकदीवर प्रभाग १३ मध्ये भगवा आणि घड्याळाचा विजय निश्चित असल्याचा विश्वास नेत्यांनी व्यक्त केला. प्रफुल्ल देवकर यांनी या प्रसंगी बोलताना सांगितले की, “मतदारांचा मिळणारा प्रतिसाद पाहता, सुजाण नागरिक विकासालाच प्राधान्य देतील आणि महायुतीच्या पाठीशी ठामपणे उभे राहतील.”
प्रचाराच्या शेवटच्या टप्प्यात महायुतीने लावलेल्या या धडाक्यामुळे विरोधकांचे धाबे दणाणले असून, संपूर्ण प्रभागात उत्साहाचे वातावरण निर्माण झाले आहे. कार्यकर्त्यांनी दिलेल्या गगनभेदी घोषणांनी परिसर दुमदुमून गेला होता.
