पोलीस कर्मचाऱ्यांनी आरोग्य तपासणी करावी – पोलीस अधीक्षक डॉ. महेश्वर रेड्डी
650 पोलीस कर्मचारी आणि कुटुंबियांची मोफत आरोग्य तपासणी
जळगाव (प्रतिनिधी): दैनंदिन तणावपूर्ण आणि धकाधकीच्या जीवनशैलीमुळे पोलीस कर्मचाऱ्यांचे आरोग्य धोक्यात येऊ शकते. त्यामुळे 40 वर्षांवरील पोलिसांनी दर दोन वर्षांतून एकदा आणि 50 वर्षांवरील पोलिसांनी वर्षातून एकदा आरोग्य तपासणी करावी, असे आवाहन पोलीस अधीक्षक डॉ. महेश्वर रेड्डी यांनी केले.
महाराष्ट्र पोलीस बॉईज संघटना आणि अरुश्री मल्टी स्पेशालिटी हॉस्पिटल यांच्या संयुक्त विद्यमाने जागतिक महिला दिनाचे औचित्य साधून मोफत आरोग्य तपासणी शिबिराचे आयोजन करण्यात आले. या शिबिराचा 650 हून अधिक पोलीस कर्मचारी आणि त्यांच्या कुटुंबियांनी लाभ घेतला.
पोलीस कर्मचाऱ्यांसाठी आरोग्य तपासणी महत्त्वाची – डॉ. रेड्डी
या प्रसंगी बोलताना डॉ. महेश्वर रेड्डी म्हणाले, “वरिष्ठ पोलीस अधिकाऱ्यांसाठी आरोग्य तपासणी बंधनकारक असते. मात्र, पोलीस कर्मचाऱ्यांसाठी अशी कोणतीही सक्ती नाही. त्यामुळे प्रत्येक पोलिसाने स्वतःच्या आरोग्याकडे लक्ष द्यावे आणि नियमित तपासणी करावी. अशा आरोग्य शिबिरांचे आयोजन नियमित व्हावे,” असेही त्यांनी नमूद केले.
तज्ज्ञ डॉक्टरांकडून विविध तपासण्या
या शिबिरात तज्ज्ञ डॉक्टरांनी उपस्थित पोलीस आणि त्यांच्या कुटुंबीयांची तपासणी केली. यामध्ये लिपिड प्रोफाईल, कोलेस्ट्रॉल, रक्त तपासणी, बीपी, शुगर, दमा, त्वचारोग, हाडांचे विकार, डोळे, कान-नाक-घसा, न्यूरो, बालरोग आणि मूत्रविकार तपासण्या करण्यात आल्या.
तपासणी करणाऱ्या तज्ज्ञ डॉक्टरांमध्ये डॉ. परीक्षित बाविस्कर, डॉ. स्वाती बाविस्कर, डॉ. मनोज पाटील, डॉ. अजय सोनवणे, डॉ. अमित भंगाळे, डॉ. राहुल पवार, डॉ. वैशाली पुरी, डॉ. गोपाल घोलप, डॉ. सिद्धांत घोलप, डॉ. निकिता आंधळकर, डॉ. गोपाल थिलक, डॉ. धर्मेश पालवे, डॉ. गौरव बावणे आणि वैद्यकीय प्रतिनिधी गोपाल चौधरी यांचा समावेश होता.
संघटनेच्या प्रयत्नांमुळे शिबिर यशस्वी
या शिबिराच्या यशस्वी आयोजनासाठी महाराष्ट्र पोलीस बॉईज संघटनेचे संस्थापक अध्यक्ष राहुल दुबाले यांच्या मार्गदर्शनाखाली जळगाव जिल्हा संपर्क प्रमुख कुणाल मोरे, किरण राजपूत, तन्वी पांडव, चेतन वाणी, राकेश कांबळे यांनी मेहनत घेतली. तसेच जळगाव जिल्हा पोलीस प्रशासन, सामाजिक कार्यकर्ते भगवान सोनवणे, मुक्ती फाऊंडेशनचे मुकुंद गोसावी, हेमंत भंगाळे, राहुल सूर्यवंशी, अकील शेख, ममता राजपूत, उमा महाले, मनीषा साळुंखे आणि सुधीर शिरसाळे यांनी विशेष परिश्रम घेतले.
पोलीस कर्मचाऱ्यांसाठी आरोग्य शिबिरांची गरज
या उपक्रमामुळे पोलीस कर्मचाऱ्यांच्या आरोग्याविषयी जनजागृती होण्यास मदत झाली. पोलीस विभागात अशा आरोग्य तपासणी शिबिरांचे नियमित आयोजन व्हावे, अशी अपेक्षा व्यक्त केली जात आहे.
