जिल्ह्यातील वेगवेगळ्या घटनेत तिघांनी जीवनाला कंटाळून उचलले टोकाचे पाऊल..
शेतकऱ्यासह अल्पवयीन मुलगा आणि युवकाचा गळफास; भडगाव यावल, पारोळा तालुक्यातील घटना
जळगाव प्रतिनिधी जिल्ह्यासह राज्यात आणि देशात आत्महत्या करणाऱ्यांचे प्रमाण अलीकडे वाढले असून विविध कारणांनी आत्महत्या होत आहेत. जळगाव जिल्ह्यातही शेतकरी, अल्पवयीन मुलगा आणि युवकाने गळफास घेऊन जीवन संपविल्याची दुर्दैवी घटना घडली आहे. यावल पारोळा आणि भडगाव या ठिकाणी गळफास घेतल्याच्या या घटना घडल्या.
पारोळा तालुक्यातील कंकराज येथील 49 वर्षीय देवदास शामराव पाटील यांनी सहा जानेवारी रोजी गळफास घेऊन आत्महत्येचा प्रयत्न केला होता मात्र त्यांना उपचारासाठी धुळे जिल्हा रुग्णालयात दाखल केले असता पंधरा दिवसांच्या मृत्यूची झुंज दिल्यानंतर त्यांचे 19 जानेवारी रोजी निधन झाले. दरम्यान मयत देविदास पाटील यांच्या पश्चात पत्नी दोन मुले असा परिवार आहे.
तर दुसऱ्या घटनेत यावल तालुक्यातील शिरसाड येथे पंधरा वर्षीय अनिल घुसला पावरा या अल्पवयीन मुलाने शिवारातील लिंबाच्या झाडाला दोरीच्या साह्याने गळफास घेऊन आत्महत्या केल्याचा प्रकार गुरुवारी उघडकीस आला. याबाबत यावल पोलिसात अकस्मात मृत्यूची नोंद करण्यात आली आहे.
तर तिसऱ्या घटनेत भडगाव तालुक्यातील निंभोरा येथे राहणाऱ्या 21 वर्षीय कल्पेश विकास पाटील या युवकाने निंभोरा गावातील काही तरुणांच्या त्रासाला कंटाळून मावशीच्या गावी चाळीसगाव तालुक्यातील तरवाडे पेठ या ठिकाणी गळफास घेऊन आत्महत्या केली. याप्रकरणी मयत युवकाचे वडील विकास यादव पाटील यांनी पोलिसात दिलेल्या तक्रारीवरून सात संशयीताविरुद्ध आत्महत्या करण्यास प्रवृत्त केल्याप्रकरणी गुन्हा दाखल करण्यात आला आहे.
