शहर पोलिसांची धडक कारवाई; गेंदालाल मिल परिसरातून दहशत माजविणाऱ्या टोळीची धिंड

शहर पोलिसांची धडक कारवाई; गेंदालाल मिल परिसरातून दहशत माजविणाऱ्या टोळीची धिंड
जळगाव : जळगाव शहरात दहशत माजविणाऱ्या गुन्हेगारांना शहर पोलिसांनी चांगलाच धडा शिकवला आहे. गेंदालाल मिल परिसरातून दोन गावठी पिस्तूल आणि दहा जिवंत काडतुसांसह एका कारमधून चार आरोपींना पोलिसांनी अटक केली. महत्त्वाचं म्हणजे, पोलिसांनी त्यांची त्याच परिसरातून पायी धिंड काढली, जिथे ते दहशत पसरवत होते. या कारवाईमुळे नागरिकांनी पोलिसांचं कौतुक केलं असून, भाईगिरी करणाऱ्यांमध्ये भीतीचं वातावरण निर्माण झालं आहे.
शनिवारी रात्री गस्त घालत असताना, शहर पोलिसांच्या गुन्हे शोध पथकाला गेंदालाल मिल परिसरात काही संशयित व्यक्ती दिसल्या. चौकशी केली असता, त्यांनी समाधानकारक उत्तरं दिली नाहीत. त्यांची झडती घेतली असता, एका आरोपीच्या कमरेला लोड केलेलं पिस्तूल सापडलं. त्यांच्या गाडीची तपासणी केली असता, त्यात आणखी एक पिस्तूल आणि दहा जिवंत काडतुसं सापडली.
याप्रकरणी युनूस उर्फ सद्दाम सलीम पटेल (वय ३३), सौहील शेख उर्फ दया सीआयडी (वय २९), निजामोद्दीन शेख (वय ३१) आणि शोएब शेख (वय २९) या चौघांना अटक करण्यात आली आहे.
ज्या भागात ही टोळी दहशत माजवत होती, त्याच रस्त्यावरून पोलिसांनी त्यांची धिंड काढली. पोलिसांनी घेतलेल्या या भूमिकेचं नागरिकांनी स्वागत केलं आहे. या कारवाईमुळे गुन्हेगारांमध्ये पोलिसांचा धाक वाढला आहे.