विसर्जन मार्गांवर ड्रोन, सीसीटीव्ही आणि साध्या वेशातील पोलिसांची नजर
जळगाव: गणेश विसर्जन आणि ईद-ए-मिलादच्या सणांच्या पार्श्वभूमीवर जळगाव जिल्ह्यातील कायदा व सुव्यवस्था राखण्यासाठी पोलीस प्रशासन पूर्णपणे सज्ज झाले आहे. नाशिक परिक्षेत्राचे विशेष पोलीस महानिरीक्षक दत्तात्रय कराळे यांनी अधिकाऱ्यांची बैठक घेऊन विसर्जन मिरवणुकीवर ड्रोन, सीसीटीव्ही आणि व्हिडिओ कॅमेऱ्यांच्या मदतीने लक्ष ठेवण्याचे निर्देश दिले.
पोलिसांचा अतिरिक्त फौजफाटा तैनात
गणेश विसर्जन आणि ८ सप्टेंबर रोजी होणाऱ्या ईद-ए-मिलादच्या मिरवणुका शांततेत पार पडाव्यात, यासाठी पोलीस दल अलर्ट मोडवर आहे. या दोन्ही मिरवणुकांसाठी जिल्ह्यासह नाशिक, नंदुरबार, धुळे आणि अहमदनगर जिल्ह्यांमधील परिस्थितीचा आढावा घेण्यासाठी दत्तात्रय कराळे यांनी व्हीसीद्वारे बैठक घेतली.
मिरवणुकीत कोणताही अनुचित प्रकार टाळण्यासाठी पोलीस साध्या वेशातही उपस्थित असतील. कोणीही वाद निर्माण केल्यास किंवा अडथळा आणल्यास त्यांच्यावर तात्काळ कारवाई केली जाईल, असे त्यांनी सांगितले. तसेच, गर्दीच्या ठिकाणी ड्रोन आणि सीसीटीव्हीने चित्रीकरण केले जाणार असून, भविष्यात वाद झाल्यास व्यक्तींची ओळख पटवण्यासाठी या माहितीचा वापर केला जाईल.
असा असेल पोलीस बंदोबस्त
सणांच्या काळात मोठा पोलीस बंदोबस्त ठेवण्यात आला आहे, ज्यात:
पोलीस अधीक्षक: १
अपर पोलीस अधीक्षक: २
उपविभागीय पोलीस अधिकारी: ७
पोलीस निरीक्षक: ३०
पोलीस अंमलदार: १,९५३
दंगा नियंत्रण पथक (आरसीपी): १४
राज्य राखीव पोलीस दल: ९०
याशिवाय, जलद प्रतिसाद पथक, पोलीस मुख्यालयातील स्ट्रायकिंग पथक, रेल्वे पोलीस आणि महामार्ग सुरक्षा दलाचे जवानही तैनात असतील.
विसर्जन मार्गावर वाहतुकीस बंदी
अनंत चतुर्दशीच्या दिवशी विसर्जन मिरवणूक रात्री १२ वाजेपर्यंत चालणार आहे. मिरवणुकीच्या मार्गात अडथळा येऊ नये यासाठी कोर्ट चौक, नेहरू चौक, शास्त्री टॉवर, सराफ बाजार, बेंडाळे चौक या प्रमुख मार्गांसह त्या मार्गांना जोडणाऱ्या सर्व उप रस्त्यांवरील वाहतूक (अत्यावश्यक सेवा वगळता) पूर्णपणे बंद राहणार आहे.
