नागपूर हिंसाचार प्रकरणी फहीम खानसह अन्य आरोपींवर देशद्रोहाचा गुन्हा दाखल
नागपूर : औरंगजेबच्या कबरीच्या मुद्द्यावरून शहरात उसळलेल्या तणावानंतर सोमवारी सायंकाळी दोन गटांमध्ये तुफान दगडफेक झाली. या घटनेत दोन्ही गटांकडून एकमेकांवर दगडफेक करण्यात आली, ज्यामुळे पोलिसांनाही जमावाला नियंत्रित करणे कठीण गेले. या हिंसाचारात काही पोलीस अधिकारी आणि नागरिक जखमी झाले असून, संपूर्ण प्रकरणाचा तपास सुरू आहे.
या दंगलीच्या कटात मुख्य सुत्रधार असल्याचा आरोप मायनॉरिटीज डेमोक्रॅटिक पार्टीच्या नागपूर शहराध्यक्ष फहीम खान यांच्यावर ठेवण्यात आला आहे. पोलिसांनी तात्काळ कारवाई करत त्याला अटक केली असून, त्याच्यासह सहा जणांविरोधात देशद्रोहाचा गुन्हा दाखल करण्यात आला आहे. तसेच, या प्रकरणात आतापर्यंत ५० हून अधिक जण आरोपी असल्याचे पोलीस उपायुक्त लोहित मतानी यांनी स्पष्ट केले आहे.
सायबर पोलिसांची मोठी कारवाई
या दंगल प्रकरणात अफवा पसरवणाऱ्या सोशल मीडिया पोस्ट आणि व्हिडिओंवर सायबर पोलिसांनी विशेष लक्ष केंद्रित केले आहे. पोलिसांच्या माहितीनुसार, औरंगजेबविरोधातील आंदोलनाचे काही व्हिडिओ सोशल मीडियावर व्हायरल झाले, ज्याचा गैरफायदा घेत काही समाजकंटकांनी दंगल भडकवली. या प्रकारावर कठोर कारवाई करत सायबर पोलिसांनी चार वेगवेगळे एफआयआर दाखल केले आहेत.
सध्या नागपूर पोलीस विभागाकडून आरोपींचा शोध घेतला जात असून, परिस्थिती नियंत्रणात असल्याची माहिती अधिकाऱ्यांनी दिली आहे. शहरात कायदा व सुव्यवस्था राखण्यासाठी अतिरिक्त पोलीस बंदोबस्त तैनात करण्यात आला असून, नागरिकांनी कुठल्याही अफवांवर विश्वास ठेवू नये, असे आवाहन प्रशासनाने केले आहे.
