केदारनाथ दर्शनावरून परतताना नववधू रहस्यमयरीत्या बेपत्ता; रेल्वे प्रवासात नेमकं काय घडलं?
नवी दिल्ली वृत्तसंस्था केदारनाथ दर्शन करून परतणाऱ्या नवविवाहित दाम्पत्याच्या आयुष्यात एक धक्कादायक घटना घडली आहे. मनीष अग्रहरी आणि प्रज्ञा सिंह यांनी याच वर्षी फेब्रुवारी महिन्यात प्रेमविवाह केला होता. लग्नानंतर पहिल्यांदाच दोघे केदारनाथ यात्रेसाठी गेले होते. मात्र, परतीच्या प्रवासात प्रज्ञा अचानक बेपत्ता झाल्याने कुटुंबीयांसह पोलिसही हादरले आहेत.
मनीष अग्रहरी हे एका खासगी कॉर्पोरेट कंपनीत कार्यरत आहेत. ५ मे रोजी केदारनाथ दर्शन करून दोघे रेल्वेने घरी परतत होते. सुरुवातीला दोघांमध्ये सर्व काही सुरळीत होते. प्रवासादरम्यान काही वेळ गप्पा झाल्यानंतर थकव्यामुळे मनीष यांना झोप लागली.
ट्रेन पुढील स्थानकाजवळ पोहोचत असताना त्यांना जाग आली. त्यावेळी प्रज्ञा सीटवर नसल्याचे त्यांच्या लक्षात आले. सुरुवातीला ती वॉशरूममध्ये गेली असावी असे वाटले, पण बराच वेळ उलटल्यानंतरही ती परत न आल्याने मनीष यांनी संपूर्ण डब्यात शोधाशोध सुरू केली. मात्र, तिचा कुठेही पत्ता लागला नाही.
दरम्यान, एका प्रवाशाने पोलिसांना माहिती दिली की, प्रज्ञाला ट्रेनच्या कोचबाहेर जाताना पाहिले होते. तपासादरम्यान आणखी एक धक्कादायक माहिती समोर आली. प्रज्ञाच्या मोबाईलचे शेवटचे लोकेशन रेल्वे ट्रॅकजवळ आढळले. त्यानंतर तिचा मोबाईल सतत स्विच ऑफ येत आहे.
प्रज्ञाकडे रोख रक्कम किंवा अन्य प्रवासाचे साधन नसल्याने कुटुंबीयांनी घातपाताची शक्यता व्यक्त केली आहे. पोलिसांनी रेल्वे ट्रॅक, पूल आणि आसपासच्या परिसरात शोधमोहीम राबवली, मात्र अद्याप कोणताही ठोस पुरावा मिळालेला नाही.
या तपासात आणखी एक मोठा अडथळा समोर आला आहे. संबंधित रेल्वे स्थानकांवरील सीसीटीव्ही कॅमेरे बंद असल्याचे उघड झाले आहे. त्यामुळे प्रज्ञा ट्रेनमधून नेमकी कुठे उतरली किंवा तिला कोणी उतरवले का, याचा कोणताही व्हिडिओ पुरावा पोलिसांना मिळू शकलेला नाही.
पोलिसांनी प्रज्ञाचे कॉल डिटेल्स, व्हॉट्सॲप चॅट्स आणि इतर डिजिटल माहितीची तपासणी केली. मात्र, त्यात कोणताही संशयास्पद संवाद आढळून आलेला नाही. पती-पत्नीमध्ये वाद झाल्याचेही कोणतेही संकेत मिळालेले नाहीत. त्यामुळे ही घटना अपघात, आत्महत्या की कटकारस्थान, याबाबत पोलिसही संभ्रमात आहेत.
दरम्यान, पत्नीच्या बेपत्ता होण्याने व्यथित झालेल्या मनीष यांनी भावनिक साद घालत प्रशासनाकडे मदतीची विनंती केली आहे. “माझं संपूर्ण जगच उद्ध्वस्त झालं आहे. प्रज्ञा कोणत्या अवस्थेत असेल, या विचारानेही अंगावर काटा येतो,” अशी व्यथा त्यांनी व्यक्त केली आहे.
