जळगाव जिल्ह्यातील दोन पोलिस निरीक्षकांची बदली; नवे अधिकारी कोण येणार याकडे लक्ष
जळगाव (प्रतिनिधी) – पोलीस अधिकाऱ्यांच्या बदल्यांचे सत्र अद्यापही सुरूच असून, नाशिक परिक्षेत्रांतर्गत येणाऱ्या चार पोलीस निरीक्षकांच्या बदल्यांचे आदेश विशेष पोलीस महानिरीक्षक दत्तात्रय कराळे यांनी जारी केले आहेत. विशेष म्हणजे, या यादीत जळगाव जिल्ह्यातील दोन पोलीस निरीक्षकांचा समावेश आहे.
गेल्या महिन्यातच पोलीस अधिकाऱ्यांच्या सर्वसामान्य व विनंती बदल्या पार पडल्या होत्या. मात्र काही निरीक्षकांनी केलेल्या विशेष विनंत्यांचा विचार करून हे ताजे आदेश काढण्यात आले असल्याचे सूत्रांकडून समजते.
बदल्यांमध्ये नाशिक ग्रामीणचे हेमंतकुमार भामरे यांना त्यांच्या मूळ कार्यक्षेत्रातच कायम ठेवण्यात आले आहे. तसेच जळगाव येथील प्रदीप देशमुख यांची बदली नाशिक ग्रामीण विभागात करण्यात आली आहे. दुसरीकडे, चोपडा ग्रामीण पोलीस निरीक्षक अनिल भवारी यांचीही बदली नाशिक ग्रामीण विभागात झाली आहे. नंदुरबारचे हेमंतकुमार पाटील यांनाही त्यांच्या मूळ जिल्ह्यातच कार्यरत ठेवण्यात आले आहे.
जळगाव जिल्ह्यातील दोन निरीक्षकांची बदली झाल्यामुळे आता या ठिकाणी कोणते नवीन अधिकारी नियुक्त होणार याबाबत उत्सुकता निर्माण झाली आहे. जिल्ह्यातील पोलीस प्रशासनात लवकरच काही नवे चेहरे पाहायला मिळण्याची शक्यता आहे.
