जगभरात चॅटजीपीटी बंद, युजर्सना मोठा त्रास
नवी दिल्ली वृत्तसंस्था l जगभरात, भारतासह, चॅटजीपीटी सेवा ठप्प झाली आहे, ज्यामुळे लाखो युजर्सना अडचणींचा सामना करावा लागत आहे. डाउनडिटेक्टरच्या अहवालानुसार, भारतात दुपारी २:३० वाजल्यापासून चॅटजीपीटी वापरताना समस्या उद्भवत आहेत. युजर्सनी सोशल मीडियावर याबाबत मोठ्या प्रमाणात तक्रारी नोंदवल्या आहेत.
तक्रारींचे विश्लेषण केल्यास, ७८ टक्के युजर्सना वेबवरील चॅटजीपीटी सेवेत अडथळे येत आहेत, १८ टक्के युजर्सना मोबाइल अॅप वापरताना समस्या जाणवत आहेत, तर ४ टक्के तक्रारी एपीआय इंटिग्रेशनशी संबंधित आहेत.
भारतापुरतेच नव्हे, तर जागतिक स्तरावरही ही समस्या पसरली आहे.ओपनएआयने याबाबत निवेदन जारी करत म्हटले आहे, “आम्हाला चॅटजीपीटीच्या सेवेत येत असलेल्या अडचणींची माहिती आहे. आमची टीम ही समस्या सोडवण्यासाठी तातडीने काम करत आहे.” कंपनीने युजर्सना लवकरच सेवा पूर्ववत होईल, असे आश्वासन दिले आहे.
