खुनाच्या गुन्ह्यातील फरार आरोपी जळगावातून अटकेत
जळगाव (प्रतिनिधी) : तेलंगणा राज्यातील सायबराबाद पोलीस आयुक्तालयातील चंदानगर पोलीस स्टेशन हद्दीत घडलेल्या खुनाच्या गुन्ह्यातील सुमारे तीन महिन्यांपासून फरार असलेल्या आरोपीला जळगाव पोलिसांच्या मदतीने अटक करण्यात आली आहे. अझहर निजाम खाटीक (रा. जळगाव) असे अटकेत घेतलेल्या आरोपीचे नाव आहे.
चंदानगर पोलिसांचे पथक आरोपी अझहर खाटीकच्या शोधासाठी जळगावात दाखल झाले होते. त्यांनी जळगावचे पोलीस अधीक्षक डॉ. महेश्वर रेड्डी यांची भेट घेऊन गुन्ह्याची माहिती दिली. त्यांनी घटनेचे गांभीर्य लक्षात घेऊन स्थानिक गुन्हे शाखेचे पोलीस निरीक्षक बबन आव्हाड यांना मदत करण्याचे आदेश दिले.
त्यानुसार सहाय्यक पोलीस फौजदार विजयसिंग पाटील व पोलीस हवालदार अक्रम शेख यांचे एक विशेष पथक तयार करण्यात आले. गुप्त माहितीच्या आधारे पथकाने मेहरुण परिसरात आरोपी अझहर खाटीक याचा शोध घेतला. खात्रीलायक माहिती मिळाल्यानंतर पथकाने सापळा रचत शिताफीने त्याला ताब्यात घेतले.
त्यानंतर आरोपीला पुढील कायदेशीर कारवाईसाठी चंदानगर पोलीस स्टेशन, सायबराबाद पोलीस आयुक्तालय (तेलंगणा) यांच्या ताब्यात देण्यात आले आहे. या अटकेमुळे तेलंगणा पोलिसांना त्यांच्या गुन्ह्यातील एक महत्त्वाचा धागा हाती लागला आहे.
