क्रिकेट फिव्हर ऑन! जळगाव क्रिकेट लीगचा महासंग्राम आजपासून
जैन ड्रीम स्पेसेस मैदानावर १८ ते २६ एप्रिलदरम्यान थरार; उद्घाटन सोहळ्यास दिग्गजांची उपस्थिती
जळगाव | प्रतिनिधी जळगावकरांच्या क्रिकेटप्रेमाला उधाण आणणारी ‘जळगाव क्रिकेट लीग-२०२६’ (JCL) स्पर्धा आजपासून मेहरूण परिसरातील कांताई नगर येथील जैन ड्रीम स्पेसेसच्या भव्य मैदानावर रंगणार आहे. १८ ते २६ एप्रिलदरम्यान होणाऱ्या या टी-२० स्पर्धेचा थरार अनुभवण्यासाठी क्रीडाप्रेमी सज्ज झाले असून, उद्घाटन सोहळा शनिवारी सायंकाळी दिमाखात पार पडणार आहे.
दिग्गजांची उपस्थिती ठरणार आकर्षण
उद्घाटन सोहळ्यास जलसंपदा मंत्री गिरीष महाजन यांच्यासह आमदार किशोर पाटील, मंगेश चव्हाण, अमोल जावळे, अनिल पाटील, सुरेश भोळे, चंद्रकांत सोनवणे उपस्थित राहणार आहेत. जैन इरिगेशनचे अध्यक्ष अशोक जैन, जिल्हा क्रिकेट असोसिएशनचे अध्यक्ष अतुल जैन तसेच बीसीसीआयचे पंच व मान्यवरांची उपस्थितीही लाभणार आहे.
६ संघ, १०८ खेळाडू; आयपीएलच्या धर्तीवर सामने
स्पर्धेत ६ संघ सहभागी होत असून आयपीएलच्या धर्तीवर सामने रंगणार आहेत. प्रत्येक संघात १८ खेळाडू असून एकूण १०८ खेळाडू मैदानात उतरतील.
संघांची नावे
जळगाव कोगटा किंग, जामनेर सातपुडा हिरोज, पाचोरा एसकेटी योद्धाज, चाळीसगाव एसपीसीसी चॅलेंजर्स, रावेर रॉयल्स, अमळनेर सुहास जायंट्स.
आंतरराष्ट्रीय दर्जाचा मैदान अनुभव
रतनलाल सी. बाफना ज्वेलर्स प्रायोजित या स्पर्धेसाठी मैदानाला आकर्षक एलईडी स्क्रीन, फ्लड लाईट्स, प्रेक्षकांसाठी खास गॅलरी आणि दर्जेदार टर्फ विकेटची सुविधा देण्यात आली आहे. त्यामुळे प्रेक्षकांना मेट्रो सिटीतील स्टेडियमचा अनुभव मिळणार आहे.
महत्त्वाचे सामने
१८ एप्रिल (सकाळी ८:३०): जामनेर विरुद्ध पाचोरा
१८ एप्रिल (सायंकाळी ७:३०): चाळीसगाव विरुद्ध जळगाव (उद्घाटन सामना)
२४ एप्रिल: क्वालिफायर-१, एलिमिनेटर
२५ एप्रिल: क्वालिफायर-२
२६ एप्रिल: ग्रँड फायनल
या स्पर्धेमुळे जिल्ह्यातील स्थानिक खेळाडूंना मोठे व्यासपीठ उपलब्ध झाले असून, नऊ दिवस जळगावकरांना क्रिकेटचा भरपूर आनंद मिळणार आहे.
“जळगाव क्रिकेट लीगमुळे स्थानिक खेळाडूंना मोठी संधी मिळत आहे. क्रीडाप्रेमींनी या स्पर्धेचा आनंद घ्यावा.”
— अतुल जैन, अध्यक्ष, जळगाव जिल्हा क्रिकेट असोसिएशन
