राज्यात अधिकारी बदल्यांचा महापूर; एकाचवेळी ५१ आयपीएस अधिकाऱ्यांची मोठी खांदेपालट
मुंबई : राज्यातील महायुती सरकारने गेल्या काही महिन्यांत आयएएस आणि आयपीएस अधिकाऱ्यांच्या बदल्यांचा धडाका सुरूच ठेवला असून, आता तब्बल ५१ आयपीएस अधिकाऱ्यांची मोठी खांदेपालट करण्यात आली आहे. यामध्ये पुणे, मुंबई, नागपूर, नाशिक, छत्रपती संभाजीनगर, ठाणे, धुळे, हिंगोली आणि जळगाव या प्रमुख शहरांतील वरिष्ठ अधिकाऱ्यांचा समावेश आहे.
पुण्यातील शस्त्र निरीक्षक शाखेचे पोलिस अधीक्षक तेजस्वी सातपुते यांची राज्य राखीव पोलिस बल, गट क्रमांक १, पुणे येथे समादेशकपदी बदली करण्यात आली आहे. तसेच महेंद्र पंडित यांची स्तंभ २ मधून स्तंभ ३ मधील पदावर बदली करत, त्यांना बृहन्मुंबई पोलिस उपायुक्तपदी नियुक्त करण्यात आले आहे.
या बदल्यांमध्ये अनेक अधिकाऱ्यांना पदोन्नती, तर काहींना डिमोशन करत नव्या जबाबदाऱ्या देण्यात आल्या आहेत. पुणे परिमंडळ दोनच्या पोलिस उपायुक्त स्मार्तना पाटील यांची पोलीस प्रशिक्षण केंद्र, खंडाळा येथे बदली करण्यात आली आहे. तर वाहतूक पोलिस उपायुक्त अमोल झेंडे यांचीही बदली झाली आहे. पुण्यात तीन नवीन आयपीएस अधिकाऱ्यांची नेमणूकही करण्यात आली आहे.
दरम्यान, यापूर्वी १५ दिवसांपूर्वी ८ आयएएस अधिकाऱ्यांच्या बदल्या करण्यात आल्या होत्या. त्यानंतर गेल्या आठवड्यात आणखी चार आयएएस अधिकाऱ्यांचे बदल्या आदेश जारी करण्यात आले. यामध्ये मुंबई मेट्रो क्षेत्र झोपडपट्टी पुनर्वसन प्राधिकरणाचे मुख्य कार्यकारी अधिकारी पराग सोमन यांची बदली वर्धा जिल्हा परिषद मुख्य कार्यकारी अधिकारी म्हणून करण्यात आली. तर अमरावतीचे आयुक्त सचिन कळंत्रे यांची बदली पुणे येथील यशदाचे उपसंचालकपदी करण्यात आली.
मुंबईतही अनेक महत्त्वाच्या नियुक्त्या करण्यात आल्या असून, कोल्हापूरचे पोलिस अधीक्षक तुषार पाटील यांची मुंबई पोलिस उपायुक्तपदी नेमणूक झाली आहे. त्याचबरोबर विजय पवार, सुनील लोखंडे, नम्रता पाटील आणि स्मिता पाटील यांचीही मुंबईतील उपायुक्त पदावर नियुक्ती करण्यात आली आहे. यामुळे मुंबईत एकूण ५ आयपीएस अधिकाऱ्यांची पदोन्नतीवरून उपायुक्त पदावर नेमणूक झाली आहे.