कुसुंबा येथे लाच लुचपत प्रतिबंधक विभागाची कारवाई
जळगाव प्रतिनिधी :-सातबारा उताऱ्यावर आई आणि भावाचे नाव लावण्यासाठी प्रथम पाच नंतर चार आणि तडजोडी अंती तीन हजाराची लाच स्वीकारताना कुसुंबा येथे आज मंगळवार 7 रोजी सायंकाळी तलाठ्याला जळगावच्या एसीबीने अटक केली असून त्याच्याविरुद्ध एमआयडीसी पोलीस स्टेशनला गुन्हा दाखल करण्याचे काम सुरू होते. यामुळे तालुक्यात खळबळ उडाली आहे.नितीन शेषराव भोई (वय ३१ वर्षे) असे लाच स्वीकारणाऱ्या तलाठ्याचे नाव आहे.
तक्रारदाराने त्यांचे आई व भावाचे नाव सातबारा उताऱ्यावर व स्लॅब रजिस्टरवर नाव लावण्यासाठी अर्ज केला होता. मात्र यासाठी तलाठी नितीन शेषराव भोई याने ५ हजार रुपये लाचेची मागणी केली होती.
याबाबतची तक्रार तक्रारदाराने लाच लुचपत विभागाकडे 7 जानेवारी रोजी केली होती. या तक्रारीची पंचांसमक्ष पडताळणी केली असता तलाठी नितीन भोई याने सातबारा उताऱ्यावर व स्लॅब रजिस्टर वर नाव लावण्यासाठी सुरुवातीला पाच हजार तर नंतर चार व तडजोडी अंति 3 हजार रुपयांची मागणी केली. त्यानुसार आज 7 जानेवारी रोजी तलाठी नितीन भोई हा तीन हजार रुपयांची लाच स्वीकारताना रंगेहात पकडण्यात आला. त्याच्यावर एमआयडीसी पोलीस स्टेशनला गुन्हा दाखल करण्याचे काम सुरू होते.
यांनी केली कारवाई
ही कारवाई पोलीस उपअधीक्षक योगेश ठाकूर, पोलीस निरीक्षक स्मिता नवघरे, फौजदार सुरेश पाटील, पोना बाळू मराठे, पोकॉ अमोल सूर्यवंशी यांनी केली आहे.
