स्थानिक गुन्हे शाखा आणि भुसावळ बाजारपेठ पोलिसांची संयुक्त कारवाई
जळगाव: जळगाव जिल्ह्यात वाढत्या अमली पदार्थ तस्करीवर नियंत्रण मिळवण्यासाठी पोलीस अधीक्षक डॉ. महेश्वर रेड्डी यांच्या विशेष सूचनांनुसार, स्थानिक गुन्हे शाखा आणि भुसावळ बाजारपेठ पोलिसांनी संयुक्त कारवाई करत एका गांजा तस्कराला रंगेहात पकडले आहे. शुक्रवारी, २२ ऑगस्ट २०२५ रोजी मध्यरात्री २ वाजता भुसावळ येथील हॉटेल सुरुची इनसमोर राष्ट्रीय महामार्गावर रचलेल्या सापळ्यात ही कारवाई करण्यात आली.
स्थानिक गुन्हे शाखेचे पोलीस हवालदार गोपाळ गव्हाळे यांना मिळालेल्या गोपनीय माहितीच्या आधारे, एक व्यक्ती काळसर रंगाच्या मोटारसायकलवरून भुसावळ शहरात गांजाची बेकायदेशीर वाहतूक करत असल्याचे समजले. या माहितीच्या आधारावर पोलिसांनी सापळा रचला. संशयास्पदरीत्या येणाऱ्या एका होन्डा शाईन मोटारसायकलस्वाराला थांबवण्याचा प्रयत्न केला असता, तो पळून जाण्याचा प्रयत्न करू लागला. मात्र, पोलिसांनी शिताफीने त्याचा पाठलाग करून त्याला ताब्यात घेतले.
चौकशीत संशयिताने आपले नाव अनारसिंग वालसिंग भिलाला (वय ३०, रा. शमलकोट, मध्य प्रदेश) असे सांगितले. त्याच्याकडून १० किलो २७५ ग्रॅम वजनाचा गांजा, एक मोटारसायकल आणि एक मोबाईल हँडसेट असा एकूण २ लाख ९० हजार रुपये किमतीचा मुद्देमाल जप्त करण्यात आला आहे.
या प्रकरणी पोलीस कॉन्स्टेबल विकास सातदिवे यांच्या तक्रारीवरून भुसावळ बाजारपेठ पोलीस ठाण्यात एनडीपीएस कायद्यांतर्गत गुन्हा दाखल करण्यात आला आहे. पुढील तपास स्थानिक गुन्हे शाखा आणि भुसावळ बाजारपेठ पोलीस करत आहेत.
पोलीस अधीक्षक डॉ. रेड्डी यांनी या यशस्वी कारवाईबद्दल पथकाचे अभिनंदन केले असून, जिल्ह्यात अमली पदार्थ तस्करीविरोधात कठोर कारवाई सुरू राहील, असे स्पष्ट केले आहे.
