भारतात बनावट आधार कार्डद्वारे प्रवेश करणाऱ्या दोन बांगलादेशी महिलांना अटक
भुसावळ बाजारपेठ पोलिसांची कारवाई
भुसावळ, प्रतिनिधीl भुसावळ बाजारपेठ पोलिसांनी बांगलादेशी घुसखोरीचा पर्दाफाश करत दोन महिलांना बनावट आधार कार्डसह ताब्यात घेतले आहे. या प्रकरणी त्या दोघींसह तिघांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, तानिया अहमद (वय २६) आणि करीमा अख्तर (वय २२) या दोन बांगलादेशी महिलांनी रेल्वेमार्गे बेकायदा भारतात प्रवेश केला.भुसावळ रेल्वे स्थानकावर उतरल्यानंतर त्या जामनेर रोडवरील ‘हॉटेल अतिथी’ येथे थांबल्या होत्या. हॉटेल व्यवस्थापनाने ओळखपत्र मागितले असता, त्यांनी आधार कार्डच्या प्रती सादर केल्या, परंतु मूळ कागदपत्रे दाखवण्यास असमर्थ ठरल्या. यामुळे संशय बळावल्याने हॉटेल प्रशासनाने पोलिसांना कळवले.पोलिसांनी तपास सुरू केला असता, महिलांनी मुंबईत एका ‘दीदी’कडे कामासाठी जात असल्याचे सांगितले. पुढील तपासात जलाल आणि सैफुल या दोघांनी बनावट आधार कार्ड तयार करून दिल्याचे समोर आले. पोलिसांनी तानिया, करीमा आणि संबंधित दोघांना ताब्यात घेतले असून, त्यांच्याविरुद्ध कायदेशीर कारवाई सुरू आहे.या प्रकरणाचा सखोल तपास पोलीस निरीक्षक राहुल वाघ आणि सहायक पोलीस निरीक्षक सोपान पाटील यांच्या नेतृत्वाखाली सुरू आहे.
